قصتي مع الهكر من الألف الي دون الياء.!

 قصتي مع الهكر من الألف الي دون الياء.!

بقلم: سايمون دينق

بمناسبة حكاية الهكر العامل دربكة اليومين ديل...وعملا بالمثل القائل: أسأل المجرب ولا تسأل الطبيب.. داير احكي ليكم تجربتي الشخصي مع الهكر ومعركة (كسير العضام) التي دارت بيني وبينه لمدة خمس ساعات متواصلة قدرت ارجع صفحتي منه عنوة واقتدار..

الكلام دا حصل في يناير الفات.. كنت قاعد أتصفح اونلاين في امان الله .. وفجأة كدا في حوالي الساعة ١٠ صباحا .. حسابي عمل تسجيل خروج .. عيني عينك ... بالتأكيد افتكرت الأمر بسيط .. لكن وللأسف الهاكرز استلم وغيًر اي شيء .. من باسورد بتاع الايميل وتويتر والفيسبوك .. وبدأ ينشر (خارجيات) تخصه على الفور .. ولحسن حظي الهكر حقي طلع ما ناقش الحبة في العربي .. عموما ما داير اخش في التفاصيل الدقيقة ولكن ممكن تاخدو مني بعض العموميات المتعلقة بحماية صفحتك..

١ - استعادة الحساب بتكون اسهل لو انت مسجل في الفيسبوك باسمك الحقيقي الموجود في مستنداتك الرسمية ، لانو إدارة الفيس عشان يفرق بينك مع الهكر ستطالبك بإثبات شخصية عن طريق مستند رسمي تخصك.

٢- من هسي قبل وقوع (الرأس في الفاس) لو عندك اي دردشة مع حبيب أو حبيبة والحديث يتضمن (كلام تحت السرة) أو صورة أو فيديوهات حساسة .. عليك الله حصل سريع راجع الدردشات دي وامسحها عن بكرة ابيها وبعداك تعال كمل المنشور... لانو لو الهكر بتاعك طلع ود. حرا.م.. ح يخلي ريحتك طير طير قدام الناس..

٣- لازم تربط حسابك عند تسجيل الدخول بنظام المصادقة الثنائية وعبر وسائل عدة ومتنوعة زي رقم الهاتف او الرموز الاحتياطية ... الوسائل كتيرة .. ودا أهميته يعني أنه حتى لو الهكر سجل الدخول لحسابك ما ح يقدر يعمل مصادقة ثنائية، وبالتالي دخوله ما ببقى فعال.

٤- اجعل الباسورد حقك معقد جدا لدرجة أنك بنفسك ما تقدر تحفظه مثلا (؛-"*':؛_$#٨٠*٣d &$#+) بالطريقة دي الهكر قلبه بطُم من الشغلة ويٓسٌبٓ ليك لي جدك العاشر.. طبعا الباسورد دا الا تحفظه عن طريقة نسخه في الذاكرة الخارجية وتحفظه في مكان آمن... وتنسخه وتلصقه لمن تحتاج ليه.

٥ - حاول أن تعمل تغيير روتيني للباسورد بعد مرور كل فترة زمنية معقولة..

٦- وانت بتتصفح النت .. احذر الدخول في مواقع مشبوهة ولا تضغط اي رابط رسله لك شخص مجهول سوأ في الماسنجر أو الواتساب.. لانو الرابط ده غالبا مربوط ببرامج خبيثة تقوم بنسخ محتوياتك دون أن تعلم وترسلها الي الهاكرز.

٧ - الصورة قديمة ما عندها علاقة بالموضوع

حمانا الله وإياكم.